1. Bagot na marhalto ma na tubu di robean;
Horas ma hami na manganhon sai martamba sinadongan di hamu na mangalean.

2. Tubu simarhorahora ditopi ni tapian;
Sai ro ma tu hamu silas ni roha tiur nang pansarian.

3. Bona ni sek puli di dolok Sitapongan;
Sai tubu ma di hamu angka na uli, jala sai dor ma nang pangomoan.

4. Inganan ni puli di hauma salenggam;
Sai marangkup do na uli mardongan do na denggan.

5. Ranting ni bulu duri jait masijaotan;
Angkup ni hata na uli dia na sitaringotan.

6. Pat ni gaja ma tu pat ni hora;
Pahompu ni raja do hamu jala anak ni na mora.

7. Tubu bagot di robean, tubu palia dilambung huta;
Tarbarita do ompumu parompon sisegean ala parpinahan pitu rura.

8. Barita ni lampedang mardangka bulung bira;
Barita hamoraon muna tarbege do ro didia.

9. Pitu do nang lilinami paualu ugianami;
Na uli do nang nipinami, ai gohanmuna ma nuaeng hajutnami.

10. Songon sirubaruba tu dangka ni ansosoit
Anggo tu hulahula ndang boi iba marholit.

11. Tombak di dolokdolok hatubuan ni sugasuga;
Na mandanggurhon tu dook do na mangalehon tu hula-hula.

12. Nidurung situma laos dapot porapora;
molo buas iba tu hulahula, na pogos hian iba ingkon gabe mamora.

13. Tubu hau toras di dolok ni Sitapongan;
Ingkon gabe do hita jala horas molo masipaolooloan.

14. Duruduru ni huta panuanan ni salaon;
Pangidoan ni hulahula, dae do i juaon.