Fakta Seputar Danau Toba
Featured
Pengunjung Makam Raja Sidabutar di Samosir Semakin Berkurang
Tomok Samosir

Categorized | Adat Batak, History

Taringot tu Umpama

Posted on 24 June 2012 by Yulianto Parulian Saragi Sidabutar | Views (790)





Manghituhon pingkiran ni panurat tar songon on do: Ia angka adat dohot uhumna, sai godangan do i dihatahon marrupahon (berbentuk) umpama manang umpasa. Jala ingkon songon i do antong asa “lebih meresap” tu pangkilalaan. Molo naeng pasingot sada halak iba rupani jala nidok: “Ua jolo tangkas ma pingkiri hata sidohononmu”, ba nunga ulinon i nian. Alai lobi hona (lebih berkesan, lebih efektif) dope hata sipasingot i, molo martompa umpama, jala nidok:
Niarit lili bahen pambaba,
Jolo nidilat bibir asa nidok hata.

Songon i muse rupani molo naeng ondolhononhon hasisintong ni sada (pangalaho), umpamana: “Ingkon patut do tongtong pasangapon jala oloan hulahula”, lebih berkesan do i, molo tinambahon tusi: “songon hata ni umpasa ni ompunta sijolojolo tubu,”
Lata pe na lata, duhutduhut do sibutbuton.
Hata pe na hata, pangidoan ni hulahula do situruton.

Songon ma angka contoh ragamragam ni angka umpama i.

1. Na mangonai tu guna ni adat dohot uhumna:
Sinuan bulu, sibahen na las,
Sinuat adat dohot uhum, sibahen na horas.

2. Namangonai tu kewajiban menuruti adat:
Ompu Raja di jolo martungkot sialagundi,
Angka na uli tinonahon ni angka ompunta parjolo, siihuthonon ni hita na di pudi.

3. Namangonai tu kepatuhan taradop raja dohot pasangap hulahula:
Barisbaris ni gaja di rura Pangaloan,
molo marsuru raja dae do so oloan.
Di jolo raja sipareahan,
Di pudi sipaimaon.

4. Namangonai tu janji (padan):
Habang ambaroba, paiuihut rura,
Padan naung nidok, ndang jadi mubauba.

5. Namangonai tu arta teanteanan:
Niarit tarugi porapora,
Molo tinean uli, Ingkon teanon do dohot gora.

6. Namangonai tu singir dohot utang:
a. Jolo binarbar do sumban, asa binarbar pandingdingan,
Jolo ginarar do utang, asa tinunggu parsingiran.
b. Molo mauas haluang, laho ma tu dangirdangir,
Molo nunga di udean parutang, ndang margogo be parsingir.

7. Namangonai tu pardongan saripeon:
a. Butarbutar mataktak, butarbutar maningkii,
Molo mate hahana, anggina ma maningkii.
b. Ndang boi dua pungga saihot (Lapatanna: Ndang boi olion ni dua boaoa na saama saina boru na saama saina).
c. Ansuan sisadasada, pago di panguaan,
Sisamudar sisamarga, tongka masibuatan.
d. Sidangka ni arirang,
Na so tupa sirang.

8. Namangonai tu parmusuon:
a. Ndang boi bingkas bodil so jolo sampak aek (Lapatanna: so jolo adong ala).
b. Pisang na marsantung ndang tabaon (Lapatanna: Jolma na marsomba jala menyerah ndang boi bunuon. Laos songon i do nang boruboru na denggan pamatangna, ndang boi uhumon).

9. Manontuhon uhum:
a. Panggu maniktihi, hudali mangula saba:
Molo baoa do na magigi (di niolina), ba simagomago ugasanna.
b. Sidangka sidangkua, tu dangka ni singgolom,
Na sada gabe dua na tolu gabe onom, utang ni sipahilolong.
c. Sineat ni raut, gambiri tata daonna. Lapatanna: Molo adong halak menghina donganna jala dipangido rohana naeng mandame, ingkon maneat pinahan lobu do ibana panganon ni na hona hina i rap dohot raja dohot dongan sahuta.
d. Pat ni lote tu pat ni satua:
Sai mago do pangose, mamora na niuba.
e. Na tartolon jabu, anak ni manuk daonna. Lapatanna: Tartolon jabu mandok: pilitpilit ibana manopot podomanna, gabe laho tu podoman ni anggiboruna manang baona rupani. Jotjot do masa na songon i na jolo ala so marbilut, jabu, jala olo do sipata 5 ripe maringanan di sada jabu. Tole muse somalna so galak lampu borngin i. Jadi asa uang adong bada manang hansit ni roha ingkon manopoti sala ma na tartolon jabu i marhite na maneat manuk panganon ni sude isi ni jabu i.
f. Hinurpas batu, sinigat oma;
Molo ro tuhas, gana ma daonna.

10. Mangelhon poda:
a. Molo litok aek di toruan, tingkiron ma tu julu.
b. Unang songon taganing marguru tu anakna.
c. Tiniptip sanggar bahen huruhuruan:
Jolo sinungkun marga, asa binoto partuturan.
d. Pantun do hangoluan, tois hamagoan.
e. Hotang binebebebe, hotang pinulospulos,
Na hombar pinahombar, na tudos pinatudos.
f. Tangan do botohon, ujungna jarijari,
Bangko ni hata do dohonon, asal jumolo marsantabi.
g. Ndang tarunsat tanduk sian horbo.
h. Birong pe parsisiraan di jabu do ingananna;
Bontar pe anak ni hambing, di bara do ingananna.
i. Eme na masak digagt ursa:
Ba i na masa, molo denggan, ba i ma niula.
j. Suaksuak ni porda, angarangar ni sarune;
Ingot ma ho di poda doson sisolhot do tamue.
k. Gakgak halimponan, unduk dapotan.
l. Unang songon tortor ni Nangsengkang;
asa haru sangkang, rais haehaena.
m. Unang binahen aleale tu na potpot togutogu tu na bagas.
lapatanna: uang songon na mangurupi hape mangarugihon.
n. Unang halakhalahi lombang, hotorhotori na niulang.
Lapatanna: mangkalojahon na so marguna.
o. Ndang jadi pos roha marhalang ulu saganon. Lapatanna: membiarkan yang berbahaya.
p. Marbagai di na otik, mardua di na godang.
q. ndang tarpaninggalahan bara tarparulos sangkotan.
r. Ndang tarungkit batang batu, tarharhari puduan mate.
Lapatanna: ndang tarula na so “mungkin”.





Related Posts


 

Popular Posts


  Legenda Makam Raja Sidabutar
true  Tomok Samosir
true  Fakta Seputar Danau Toba
true  Legenda Sigale-gale
  Taringot tu Umpasa

2 Comments For This Post

  1. Putra Sonakmalela Says:

    mantap bah…

  2. Darwinsar Sinurat Says:

    mantap


RECENT VIDEOS

Click below to view videos...

ADVERTISEMENTS





Sidabutar.INFO at Flickr

See all photos



  • Twitter is currently flying the fail whale
  • Networked Blogs

  •  
    ADVERTISEMENTS

    Advertisement