Fakta Seputar Danau Toba
Featured
Pengunjung Makam Raja Sidabutar di Samosir Semakin Berkurang
Tomok Samosir

Categorized | Adat Batak

Mandok Umpasa

Posted on 18 June 2012 by Yulianto Parulian Saragi Sidabutar | Views (1,198)





Taringot tu na mandok umpasa

Molo naeng mandok umpasa iba sai jumolo ma nidok: “Sai dilehon Tuhanta Pardengganbasa i ma di hamu songon na nidok ni umpasa on”.

Ise do na patut mandok umpasa pasupasu.

Somalna najolo hlan hulahula do sidok angka umpasa pasupasu tu parboruonna, natoras tu ianakkonna, haha tu angka anggina, jadi ndang boi boru mandok umpasa pasupasu tu hulahulana. Alai molo porlu boi do, asal ma jolo dilapik hatana na jala didok: “Santabi di ulahula nami, ndada na naeng ma masumasu hami rajanami ia hudok pe angka umpasa annon songon tangian pangidoan nami do i tu amanta Debata”. dung i boi ma dohononna angka umpasai.

Alai ndada pola lapihon hata ianggo di tingki na mandok angka umpasa na mardomu tu na mangampu do, rupani:
Turtu ma ninna anduhur, tio ninna lote;
angka pasupasumuna i sai unang muba mose.

Ingkon maratur do dohonan angka umpasa i.

Molo torop do angka umpasa nanaeng dohonon, ingkon jagaon do asa maratur parjojor ni angka umpasa i hinatahon.

Unang rupani pinungka mandok umpasa:
Andor hadumpang togutogu ni lombu;
Sai sarimatua ma hamu sahat tu na mangiringngiring pahompu.
Dung i niudut doot umpasa:
Giringgiring gostagosta;
Sai tibu ma hamu mangiringgiring jala mangompaompa.

Ndang denggan be parjojorna molo songon i nidok.

Tar songon na di toru on ma binahen parjojor ni angka umpasa i tu na baru marbagas.

Umpasa asa togu parsaripeon nasida:
Bagot ma mararirang di toruna panggongonan.
Badanmuna ma na so ra sirang, tondimuna masigomgoman.

Umpasa hagabeon:
Bintang ma na rumiris tu ombun na sumorop;
anak pe dihamu sai riris, boru pe angtong torop.

Umpasa asa maradong:
Urat ni nangka ma tu urat ni hotang;
ba tudia pe hamu mangalangka, ba sai disi ma hamu dapotan pansamotan.

Umpasa asa sai didongani tuhanta nasida:
Eme sitambatua parlinggoman ni soborok;
Dilehon Tuhanta ma di hamu tua jala sai hot ma hamu diparorot.

Umpasa panutup:
Sahatsahat ni solu sahat ma tu bontean;
Sahat ma hamu leleng mangolu, sahat tu parhorasan dohot tu panggabean.

Jadi songon i ma nian bahenon parjojor ni angka umpasa i.

Tar jot jot do nidok tu hulahula hata pangidoan: “Sai manumpak ma tondimu manual sahalamu di hami parboruonmuna”. Ianggo najolo tutu nunga sae i jala nunga uli dohonon, alai ianggo nuaeng nunga tatanda jala taboto Tuhanta sambing do silehon tua. Ala ni i naeng ma tambaanta i jala dohononta: “Sai manumpak ma tondimu manuai sahalamu marhite tangiangmuna mangido pasupasu sian Tuhanta di hami parboruon muna!”

Angkup ni i somal do sai tadok di parhataan adat “Ompunta Debata”. Tapauba ma i jala tadok: “Amanta Debata Jahowa”, asa sanggam tu ugamonta.





Related Posts


 

Popular Posts


  Legenda Makam Raja Sidabutar
true  Tomok Samosir
true  Fakta Seputar Danau Toba
true  Legenda Sigale-gale
  Taringot tu Umpasa

2 Comments For This Post

  1. Putra Sonakmalela Says:

    mantap bah…

  2. Darwinsar Sinurat Says:

    mantap


RECENT VIDEOS

Click below to view videos...

ADVERTISEMENTS





Sidabutar.INFO at Flickr

See all photos



  • Twitter is currently flying the fail whale
  • Networked Blogs

  •  
    ADVERTISEMENTS

    Advertisement